Miaka 50 ya Chuo cha Maji na simulizi ya ‘Endala Kubhi.’


Rais Mstaafu wa Awamu ya Nne Mhe. Dkt. Jakaya Mrisho Kikwete akikata keki wakati wa maadhimisho ya miaka 50 ya Chuo cha Maji yaliyofanyika hivi karibuni Jijijini Dar es Salaam.

Tarehe 31 Januari, 2024 Chuo cha Maji kilifikisha miaka 50 tangu kianze kuandaa watalaam wa Sekta ya Maji hapa nchini. Rais Mstaafu wa Awamu ya Nne Mhe. Dkt. Jakaya Mrisho Kikwete alijionea tukio hili katika ukumbi wa mikutano wa Mlimani City Jijini Dar es Salaam.

VIDEO YA MIAKA 50 YA CHUO CHA MAJI BOFYA HAPA

Washiriki wengine walioshuhudia tukio hilo ni pamoja na Waziri wa Maji Mhe. Jumaa Aweso (Mb), washirika wa maendeleo  na wadau wengine wa sekta ya maji ambao walikuwa wajumbe na wakishiriki Kongamano la Tatu la Kimataifa la Kisayansi la Maji linaloandaliwa na Wizara ya Maji kwa kushirikiana na Chuo cha Maji. 

Washiriki mbalimbali wa Kongamano la Tatu la Kimataifa la Kisayansi la Maji ambalo lilienda sambamba na maadhimisho ya miaka 50 ya Chuo cha Maji

Mengi yaliyozungumzwa katika tukio hilo na yaliamsha simulizi nyingi za kusisimua kuhusu mipango na mkakati wa kuiwezesha serikali ya Tanzania kuwa na wataalam wabobezi katika fani ya maji. Yapo yaliyozungumzwa na Mgeni Rasmi Mhe. Dkt. Jakaya Mrisho Kiwete. Yapo yaliyozungumzwa kupitia video fupi ambayo ilikusanya ushuhuda wa waliowahi kuwa viongozi wa taasisi hiyo muhimu na wasomi waliopata utaalam wao katika Chuo cha Maji.

Pia, viongozi wa sasa wa Sekta ya Maji akiwemo Waziri wa Maji Mhe. Jumaa Aweso (Mb).  Ni hakika muendelezo wa tukio kuanzia mwanzo hadi mwisho wake wahusika wote walistahili ‘maua yao’ kuhusu masuala ya maji. Waliandaa tukio likapendeza, likafana, likaionesha seka ya maji ilivyopiga hatua nchini Tanzania, kwa historia hadi hivi sasa.

Simulizi zilidhihirisha mikakati bora inayofanywa na viongozi waliopita na waliopo sasa kuanzia kwa waziri mwenye dhamana Mhe. Jumaa Aweso (Mb) kuhakikisha chuo hicho kinajipambanua kuwa tanuru la kupika na kuzalisha wasomi wenye fikra tunduizi ndani ya malengo ya awali ya kuanzishwa kwake kuhusu huduma ya maji kwa jamii.

Simulizi zilieleza jinsi waliotangulia kuongoza serikali walivyoonesha nia ya dhati ya kuhakikisha fursa ya hicho chuo kunufaisha nchi ya Tanzania kwanza, badala ya nchi nyingine za Afrika ambazo pia zilikuwa katika kinyanganyiro hasa baada ya azimio kutoka katika vikao vya iliyokuwa Umoja wa nchi huru za Afrika (OAU).  OAU iliazimia kujengwa chuo cha kuandaa wataalam wa maji Afrika bila kuainisha wapi na eneo la kujenga.

Rais Mstaafu Mhe. Dkt. Jakaya Kikwete akizungumza na Naibu Katibu Mkuu Wizara ya Maji Mhandisi Mwajuma Waziri mara baada ya kuwasili 

Mapambano haya ya kuivutia fursa nchini Tanzania ndiyo yanayokumbusha simulizi ya Endala kubhi maarufu kwa Wakerewe ambayo kwa Kiswahili inafanana kwa karibu sana na msemo wa Kiswahili unaotumika usemao ‘Anayelala na mgonjwa ndiye anayejua mihemo yake.’

Kisa cha ‘Endala Kubhi’ kutoka kwa Wahenga wa Kikerewe kinaanzia kipindi ambacho kisiwa cha Ukerewe kilikumbwa na upungufu wa chakula. Hali hiyo ya uhaba ilienda sambamba na upepo mkali ambao ulikuwa ukivuruga hali ya ziwa Victoria na kufanya kazi ya uvuvi kuwa ngumu tofauti na wenyeji walivyozoea.

Katika mazingira hayo magumu ya kupata chakula mzee mmoja mzoefu wa kazi ya uvuvi aliendelea kupambana na huo upepo mkali maarufu kisiwani hapo kama ‘Omlimbe’. Mwisho wa siku Mzee huyu alikuwa akirudi na samaki wa kutosha kwa familia yake na majirani wachache waliomzunguka.

Alipokuwa akiulizwa na wenzake kwa nini anahatarisha maisha yake kiasi hicho, jibu lake lilikuwa ni fupi sana. Endala kubhi niyo ekwimanya. (aliyelala vibaya/aliyelala na njaa ndiye anajijua). Msemo huo ukazaa methali ya Kikerewe, ‘Endala kubhi niyo ekwimanya.’ Waswahili wakasema anayelala na mgonjwa ndiye anajua mihemo yake.

Dkt. Adam Karia ni Mkuu wa Chuo hicho (Rector). Anatoa pongezi kwa viongozi wote waliotangulia kwa kuona umuhimu wa kuwa na chuo ambacho kinazalisha wasomi ambao wataweza kusaidia maendeleo ya Sekta ya Maji, hapa nchini na nje ya nchi pia.

Rais Mstaafu Mhe. Dkt. Jakaya Kikwete akimkabidhi zawadi Mkuu wa Chuo cha Maji Dkt. Adam Karia

Heshima za kipekee anazielekeza kwa uongozi wa awamu ya Sita chini ya Rais Samia Suluhu Hassan na Waziri wake wa Maji Mhe. Aweso. Anasema yeye kama Mkuu wa Chuo amekuwa na nafasi ya kufanya makubwa yanayoonekana leo hii kutokana na utayari wa viongozi hao walio juu yake kuanzia kwa waziri mwenye dhamana ya chuo hicho Mhe. Jumaa Aweso (Mb) hadi Rais wa Tanzania Mhe .Dkt.  Samia Suluhu Hassan.

Anasema ndani ya kipindi chake cha uongozi amekuwa na mazungumzo na Waziri Aweso ambaye pia amekuwa na mazungumzo na Rais wa Jamhuri ya Muungano wa Tanzania Mhe. Dkt. Samia Suluhu Hassan ili kuhakikisha chuo hicho kinapewa fursa zote za kukiwezesha kifanye kazi. Jitihada hizo zimewezesha maboresho makubwa kuonekana katika kipindi cha awamu ya sita. Chuo hicho hivi sasa kina miundombinu ambayo inaonekana wazi na inayowezesha mazingira mazuri ya kujifunza na kufundishia.

Mkuu wa Chuo Dkt. Adam Karia akizungumza wakati wa Maadhimisho ya Miaka 50 ya Chuo cha Maji

“Nimekuwa Mkuu wa Chuo tangu Januari 2020. Sasa natimiza miaka minne. Kuanzia mwaka huo tumeendeleza kazi ambayo wakuu wengine walikuwa wanaifanya lakini sisi tumeifanya kwa staili tofauti. Tumefanya maboresho makubwa kutokana na utayari wa viongozi wetu wa serikali ya awamu ya sita. …tumejenga maktaba kubwa. Naamini katika vyuo vya elimu ya juu nchini pengine inaweza kuwa maktaba ya pili kwa ukubwa.” Dkt. Karia anasema na kufafanua kwamba Maktaba hiyo inaweza kuhudumia zaidi ya wateja wa kusoma  600 kwa wakati mmoja.

 Anasema Chuo kimejenga madarasa mapya 17. Kimekarabati mabweni sita likiwemo bweni ambalo limepewa jina la Mhe. Aweso kama kumbukumbu kwa makubwa aliyotekeleza katika chuo hicho. Anasema yote hayo yamewezekana kutokana na utayari wa viongozi walioko madarakani hapa nchini.

Washing’ton Nyakale Mtayoba akipokea zawadi kutoka kwa Mgeni Rasmi Rais Mstaafu Dkt. Jakaya Kikwete

Mkuu wa Chuo hicho kwa kipindi cha  awamu ya tatu Mhaidrolojia Washing’ton Nyakale Mtayoba ambaye amekiongoza chuo hicho kuanzia mwaka 1982 hadi mwaka 1992 amesimulia historia kwamba uamuzi wa kujenga Chuo cha Maji uliibuliwa katika vikao vya taasisi ya nchi za Afrika yaani Umoja wa Nchi huru za Kiafrika (OAU) kupitia Tume yake ya Uchumi (Economic Commission for Africa).

Anasema kwamba uamuzi huo haukuwa kwamba chuo kijengwe nchini Tanzania bali iliamuliwa ndani ya kikao kijengwe chuo mahali fulani Barani Afrika ili kisaidie mahitaji makubwa ya wataalam wa sekta ya maji na kusaidia shughuli nyingine zinazotokana na maji.

Anasema wakati huo pia serikali ya Tanzania ilikuwa ikiendesha Program ya Maendeleo ya Sekta ya Maji kwa hiyo  ilikuwa ni fursa muhimu ya kuchangamkia kwa sababu wao ndio walikuwa wakilala na mgonjwa. Wao ndio walikuwa wakijua mahitaji ya Taifa kama mzee Endala Kubhi wa Ukerewe alivyokuwa akijua mahitaji ya familia yake. Wakafanya kila jitihada kushawishi ili chuo hicho kijengwe nchini Tanzania, hilo likafanikiwa.

Hivyo, Chuo kikaja Tanzania chini ya Mkuu wake wa kwanza raia wa nchini Sweden Bwana Carl Eric Westberg mwaka 1974 wakati huo kikiitwa Water Resources Institute, baadaye kikaitwa Rwegarulila Water Institute ikiwa pia ni kumbukumbu ya Katibu Mkuu wa Wizara ya Maji, mwaka 1974, Wizara ambayo ndiyo iliyokuwa na dhamana ya maji wakati chuo kinaanzishwa. Baadaye kikaitwa Water Development and Management Institute. Hiyo ni historia, na leo hii chuo kinaitwa Water Institute (Chuo cha Maji)

Ndoto ya Mkuu wa Chuo hicho kwa sasa Dkt. Karia ni kukiweka kuwa Chuo cha Maji Kikuu na cha Kimataifa ambacho kinaweza kupambana na vyuo vikuu vya mataifa mbalimbali duniani vilivyojikita katika masuala ya maji.

Mheshimiwa Kikwete anaziona ndoto za Dkt Karia zinatimia sasa kwa uwekezaji mkubwa wa Serikali. Anampongeza kwamba amefanya mageuzi makubwa ikiwemo kuwa na mtaala ambao unasaidia kupata ajira kwa haraka na kujiajiri. (Competence Based) Anasisitiza kuwa wasomi waliozalishwa na chuo hiki wamekuwa ni msaada mkubwa katika kulisogeza mbele taifa katika Sekta ya Maji. Uhalisia unabaki kuwa maji ni huduma muhimu katika jamii ya Watanzania, hivyo chuo kinachoandaa wataalam wa maji nacho ni lulu kwa jamii.

 

 

 

 

 

 

 

 

 

Comments

Post a Comment

Popular posts from this blog

Ujenzi wa Mabwawa kusaidia kuondoa changamoto ya maji Dodoma

Image
Wajumbe wa Bodi ya Maji ya Taifa wakiwa katika eneo la mradi wa maji Manda Video ya tukio Bofya HAPA Mkandarasi akiendelea na ujenzi wa Bwawa la Maji Mtamba   Mkuu wa Kitengo cha Usalama wa Mabwawa, Idara ya Rasilimali za Maji, Domina Makene akitoa maelezo ya mradi wa maji Manda Mhandisi Geofrey Semkonda wa Bodi ya Maji Bonde la Rufiji akiwapitisha wajumbe wa Bodi ya Maji Ya Taifa kwenye mchoro wa ramani ya Bwawa la maji Mtamba. Bodi ya Taifa ya Maji imefanya ziara ya kutembelea miradi ya ujenzi wa bwawa la maji la Mtamba Wilayani Mpwapwa na Bwawa la Manda wilayani Chamwino mkoani Dodoma ambayo kwa pamoja yanayotarajia kugharimu shilingi Bilioni 1.3. Mabwawa haya yanajengwa na Bodi ya Maji ya Bonde la Rufiji na yanatarajia kutumika katika shughuli za kibinadamu ikiwemo kilimo cha umwagiliaji, mifugo na matumizi ya kawaida ya binadamu.   Akizungumza wakati wa ziara hiyo Mwenyekiti wa Bodi hiyo Mhandisi Mbogo Futakamba, amesema mabadiliko ya tabia nchi yameathili sehemu mbal...
Read more

Wataalamu Sekta ya maji shirikishaneni maarifa – Naibu Waziri Maji

Image
  Naibu Waziri Mhandisi Maryprisca Mahundi (wa tano kutoka kulia) katika picha ya pamoja mara baada ya kukagua kazi zinazofanywa na moja ya washiriki kutoka Uholanzi Mhandisi Mahundi mara baada ya kuzindua Jarida la usimamizi wa rasilimali maji, uhandisi, menejimenti na sera. Jarida hilo linalenga kuboresha taarifa na kuweka jukwaa la wadau na wataaluma walio katika sekta ya maji kuchapisha kazi zao za kitafiti. Picha ya pamoja ya Mgeni Rasmi na baadhi ya wajumbe wa kongamano la Kisayansi la maji Wajumbe wakiendelea na kongamano katika ukumbi wa Julius Nyerere jijini Dar es Salaam Picha ya pamoja ya Mgeni Rasmi na baadhi ya wajumbe wa kongamano la Kisayansi la maji Naibu Waziri wa Maji Mhandisi Maryprisca Mahundi akipata maelezo kwenye moja ya mabanda ya maonesho ya wadau walioshiriki katika Kongamano la Kisayansi la maji jijini Dar es Salaam  Mhandisi Mahundi akikata utepe kuashiria uzinduzi wa Jarida la usimamizi wa rasilimali maji, uhandisi, menejimenti na sera. Jarida hilo...
Read more

Katibu Mkuu Wizara ya Maji asisitiza matumizi ya mfumo wa taarifa za sekta ya maji (Maji App)

Image
Katibu Mkuu Wizara ya Maji Mhandisi Anthony Sanga Katibu Mkuu Wizara ya Maji Mhandisi Anthony Sanga amewataka wataalam wa sekta ya maji kuhakikisha wanahuisha takwimu na taarifa mbalimbali kwenye mfumo unaotoa taarifa za sekta ya maji, Maji Mobile Application (Maji App) ili kuendana na mabadiliko ya kila siku. Mhandisi Sanga amesema mfumo huo ulizinduliwa na Mhe. Samia Suluhu Hassan Rais wa Jamhuri ya Muungano wa Tanzania Machi 22, 2022 kwa lengo la kurahisisha upatikanaji wa taarifa za sekta ya maji kwa wakati. Ameyasema hayo wakati akifungua kikao kazi cha wataalam wanaojenga mifumo na masuala ya takwimu katika sekta ya maji jijini Dodoma leo. Wataalamu wa sekta ya maji katika kikao kuhusu takwimu na mifumo ya kieletroniki  Ameongeza   kuwa kwa muda mrefu sekta ya maji imekuwa ikikabiliwa na changamoto ya upatikanaji wa takwimu sahihi, zenye ubora na kwa wakati. Pia kuwepo kwa   mifumo ya kielektroniki katika Idara za Wizara na Taasisi zake ambayo ilikuwa haiongei ...
Read more